Жаҳон олтин кенгаши (WGC) маълумотларига кўра, Ўзбекистон Марказий банки январь ойида дунёдаги ягона йирик олтин сотувчиси бўлган.
Йилнинг биринчи ойида Ўзбекистон хорижга 12 тонна қимматбаҳо металл сотган. Бу ўтган йилнинг биринчи чорагидаги ҳажмнинг деярли ярмини ташкил этади.
Умуман олганда, жорий йил январь ойида жаҳон марказий банклари биргаликда глобал олтин захираларини 31 тоннага оширди. Ҳисобот даврида Туркия Марказий банки энг кўп – 23 тонна олтин сотиб олган. Шунингдек, Хитой Халқ банки 15 тонна ва Қозоғистон Миллий банки 4 тонна қимматбаҳо металл харид қилди.
Бундан ташқари, Европа Марказий банки олтин захираларини 2 тоннага оширган. Бироқ бу , WGC маълумотига кўра, Хорватиянинг евроҳудудга 20-аъзо сифатида қўшилиши билан боғлиқ.
Эслатиб ўтамиз, аввалроқ Статистика агентлиги январь ойида олтин Ўзбекистон экспорт тушумининг ярмидан кўпини ташкил қилгани ва унинг сотилиши ҳажми 1,18 миллиард долларни ташкил этгани ҳақидаги маълумотини эълон қилган эди.
